Региональная газета «Слуцкі край»
2014 год стаў адметным для Слуцкага раённага цэнтра
карэкцыйна-развіваючага навучання і рэабілітацыі
20.02.2015
Калектыў занесены на Дошку гонару Слуцкага раёна па выніках работы за 2013 год, узнагароджаны дыпломам I ступені Міністэрства адукацыі Рэспублікі Беларусь па выніках V рэспубліканскага конкурсу «Сучасныя тэхналогіі ў спецыяльнай адукацыі», прызнаны лепшым цэнтрам карэкцыйна-развіваючага навучання і рэабілітацыі ў рэспубліцы.
«Вядома ж, гэта заслуга ўсяго калектыву, а таксама бацькоў выхаванцаў і ўсіх, хто супрацоўнічае з намі», – гаворыць дырэктар ЦКРНіР Інэса Міхайлаўна Панамарова.
Дасведчаны спецыяліст, упэўнены кіраўнік, выдаты арганізатар, клапатлівая гаспадыня і мама не толькі для сваіх родных. У сістэме спецыяльнай адукацыі яна – з 1992 года, можна сказаць, з самага пачатку яе фарміравання, таму выдатна ведае патрэбы асобых дзяцей і іх бацькоў. З 2005 года была намеснікам дырэктара ЦКРНіР, а ў 2008 узначаліла ўстанову. У 2012 годзе занесена на дошку Гонару Слуцкага раёна.
– Маё адчуванне, што я нарадзілася з якасцямі, неабходнымі для работы з асобымі дзецьмі, – усміхаецца Інэса Міхайлаўна. – Гэта – ад маіх любімых бацькоў. Мама працавала медыкам, тата – педагогам. Я хацела адпавядаць спадзяванням і мамы, і таты, таму абрала медыка-педагагічную спецыяльнасць настаўніка-дэфектолага. Да таго ж у горадзе, дзе я расла, была школа-інтэрнат.
Бацькі сфарміравалі, лічыць Інэса Міхайлаўна, яе разуменне сваёй ролі ў жыцці блізкіх. Таму дапамагаць асобым дзецям знайсці сваё месца ў соцыуме, сярод здаровых аднагодкаў, стала справай яе жыцця. Робячы любую справу, трэба быць зацікаўленым, разлічваць на вынік, а інакш і пачынаць не варта. Гэта жыццёвы прынцып І.М. Панамаровай.
– У нашым цэнтры працуюць добразычлівыя, цярплівыя, уважлівыя людзі, яны прымаюць і разумеюць і дзетак, і іх бацькоў, – гаворыць Інэса Міхайлаўна. – Мы любім дзяцей, з якімі працуем, творча падыходзім да арганізацыі працэсу навучання і выхавання, цесна ўзаемадзейнічаем з сем’ямі. І дзякуючы гэтаму нашы выхаванцы – актыўныя ўдзельнікі ўсіх мерапрыемстваў для асобых дзяцей, заўсёды адзначаюцца дыпломамі. У цэнтры – моцная сацыяльна-педагагічная і псіхалагічная служба. Гэта перш за ўсё педагог-псіхолаг Ала Юрьеўна Капская – распрацоўшчык нашага ўнікальнага праекта «Горад роўных магчымасцей», педагог-псіхолаг Нелі Міхайлаўна Лебедзь, сацыяльны педагог Іна Іванаўна Лукашэвіч, па ініцыятыве якой ужо традыцыйна праводзіцца акцыя дружбы і міласэрнасці «Семь дорожек радуги». Не магу не адзначыць майго намесніка Анжэлу Альбертаўну Сеўрук, якая таксама ўнесла значны ўклад у фарміраванне сістэмы спецыяльнай адукацыі на Случчыне.
Вельмі важны напрамак дзейнасці цэнтра – дыягностыка і камплектацыя груп для аказання спецыялістамі дапамогі дзецям з асаблівасцямі псіхафізічнага развіцця. Вялікую работу праводзяць Алена Канстанцінаўна Марціновіч (куратар спецыяльных груп і пунктаў карэкцыйна-педагагічнай дапамогі ўстаноў дашкольнай адукацыі), Аксана Леанідаўна Стасевіч (куратар пунктаў карэкцыйна-педагагічнай дапамогі), Марына Валер’еўна Нікановіч (куратар класаў інтэграванага навучання і выхавання).
Не пералічыць у невялікім артыкуле ўсяго, што робіць дружная каманда выдатных спецыялістаў ЦКРНіР для сваіх выхаванцаў і іх бацькоў. Шчаслівыя вочы дзяцей, добрыя словы бацькоў, талерантныя адносіны да асобых дзяцей, якія фарміруюццца ў грамадстве, – лепшыя доказы ўвагі і клопату.
– Мы павінны зрабіць для нашых дзяцей усё магчымае, я веру, што наш горад стане горадам роўных магчымасцей, – упэўнена Інэса Міхайлаўна Панамарова.
Ірына МІРГАРОДАВА