Региональная газета «Слуцкі край»
Волонтеры навестили центр коррекцио- развивающего
обучения и реабилитации
24.04.2015
Валанцёрскі рух – справа высакародная. Людзі з адкрытымі сэрцамі заўсёды гатовы прыйсці на дапамогу, сваімі справамі падтрымліваюць і распаўсюджваюць ідэі дабра і міласэрнасці.
22 красавіка валанцёры Слуцкага дзяржаўнага сельскагаспадарчага прафесійнага ліцэя наведалі выхаванцаў цэнтра карэкцыйна-развіваючага навучання і рэабілітацыі і разам з імі правялі эколага-патрыятычную акцыю. Напомнім, што ў 2015 годзе ЦКРНіР ажыццяўляе праект «Горад роўных магчымасцей», да якога далучаюцца не толькі навучальныя ўстановы раёна, але і могуць удзельнічаць усе нераўнадушныя случчане.
– Праект накіраваны на павышэнне культуры талерантных паводзін у грамадзян, стварэнне пазітыўнага вобраза чалавека з асаблівасцямі псіхафізічнага развіцця, – падкрэслівае дырэктар ЦКРНіР Інэса Міхайлаўна Панамарова. – Праз сумесную дзейнасць са здаровымі аднагодкамі нашы выхаванцы атрымліваюць навыкі ўзаемадзеяння ў соцыуме, маюць магчымасць развіваць свае здольнасці.
Валанцёры і выхаванцы цэнтра – добрыя сябры, яны пастаянна супрацоўнічаюць, рэалізуюць сумесныя праекты. На гэты раз навучэнцы заняліся добраўпарадкаваннем тэрыторыі ЦКРНіР, аформілі клумбы. Дрэўцы пасадзілі ў гонар 70-й гадавіны Вялікай Перамогі. А ў творчай майстэрні кіпела работа па падрыхтоўцы да Свята працы: сімвал міру – галубоў – рабілі з паперы разам з педагогамі.
Візіт валанцёраў працягваўся цудоўным канцэртам, артыстаў прымалі з цеплынёю і радасцю, як, дарэчы, і заўсёды. Завяршылі акцыю чаяпіццем. Навучэнцы ліцэя частавалі выхаванцаў цэнтра сваёй смачнай выпечкай.
– Падобныя акцыі, сустрэчы вельмі карысныя і неабходныя як дзецям з ЦКРНіР, так і нашым навучэнцам, – адзначыла намеснік дырэктара сельскагаспадарчага ліцэя па выхаваўчай рабоце Ларыса Іванаўна Данілоўская. – Яны разам вучацца беражлівым адносінам да наваколля, маюць магчымасць праявіць свае творчыя здольнасці, падзяліцца добрым настроем.
– Калі ты аддаеш часцінку сваёй душы іншаму, то атрымліваеш нашмат больш. Мы разумеем гэта, – падтрымлівае навучэнка ліцэя Настасся Бародзька. – Прыемна будзе дзецям улетку адпачываць у прыгожым двары цэнтра, а нам – усведамляць, што і мы паўдзельнічалі ў добрай справе.
– А для мяне важна, што мы пасадзілі дрэўцы як сімвал памяці пра подзвіг народа ў час Вялікай Айчыннай вайны, – далучаецца да размовы ліцэістка Крысціна Жук. – Няма ў Беларусі сям’і, якую б не закранула вайна. Пра гэта павінны памятаць усе.
Выхаванцы і педагогі ЦКРНіР з удзячнасцю прымаюць гасцей. Яны самі ініцыіруюць і ахвотна далучаюцца да цікавых спраў.
– Нашы дзеці могуць усё, што і іх здаровыя аднагодкі. Трэба толькі даць ім магчымасць, падтрымаць, дапамагчы, – гаворыць педагог сацыяльны Іна Іванаўна Лукашэвіч. – Яны ўдзельнічаюць у конкурсах, спартландыях, рыхтуюць сувеніры да свят, з задавальненнем спяваюць, танцуюць, умеюць і ежу прыгатаваць. І такія акцыі, як сённяшняя, даюць ім магчымасць адчуваць сябе ўпэўнена.
Ірына МІРГАРОДАВА.