Региональная газета «Слуцкі край»
Чым год мінулы стаў адметны
31.12.2014
«Слуцкі край» паведамляў пра перамогу Слуцкага цэнтра карэкцыйна-развіваючага навучання і рэабілітацыі ў першым рэспубліканскім конкурсе «Лепшая ўстанова спецыяльнай адукацыі». Калектыў цэнтра адзначаны дыпломам першай ступені, атрымаў сімвал конкурсу – шкляную выяву бусліка, а ў падарунак – ноўтбук.
Пра ўдзел у конкурсе расказала дырэктар цэнтра карэкцыйна-развіваючага навучання і рэабілітацыі Інэса Міхайлаўна ПАНАМАРОВА:
– Конкурс у рэспубліцы праводзіўся ўпершыню, таму перамога для нашага калектыву прыемная і адметная. У першым этапе прымалі ўдзел 23 цэнтры карэкцыйна-развіваючага навучання і рэабілітацыі Мінскай вобласці. Мы перамаглі, нас вылучылі для ўдзелу ў другім этапе: на ім былі прадстаўлены сем устаноў. У тройцы мацнейшых выйшлі ў фінал: нашымі канкурэнтамі былі ЦКРНіР Партызанскага раёна горада Мінска і Гомельскага абласнога ЦКРНіР (дарэчы, у Беларусі дзейнічае 141 ЦКРНіР). Абараняць праект «Адукацыйная прастора – тэрыторыя талерантнасці» і пераход да новай ступені – «Горад роўных магчымасцей» нам дапамагалі 54 удзельнікі: выхаванцы цэнтра дзіцячай творчасці, валанцёры, прадстаўнікі Беларускага Таварыства Чырвонага Крыжа, Маладзёжнага парламента, навучэнцы медыцынскага каледжа, сельскагаспадарчага прафесійнага ліцэя, вучні СШ №13 горада Слуцка (гэта, дарэчы, наша апорная ўстанова) – згуртаваліся не толькі выхаванцы нашага цэнтра, але і дзеці, якія займаюцца па агульнаадукацыйнай школьнай праграме. Мы паказалі цеснае ўзаемадзеянне асобых дзяцей з іх здаровымі аднагодкамі. Нашу прадстаўнічасць і шматлікасць адзначылі члены журы. Нам уручылі дыплом І ступені ў намінацыі «Лепшы цэнтр карэкцыйна-развіваючага навучання і рэабілітацыі».
Перамога прыемная, але гэта – не самамэта. Наш праект накіраваны на тое, каб кожнае дзіця з асаблівасцямі развіцця адчувала сябе камфортна і ўтульна, было роўным сярод роўных у грамадстве. Дзеля гэтага і працуем. А таму ўзаемадзейнічаем з сем’ямі, бо менавіта сям’я – сімвал любві, узаемаразумення, падтрымкі і носьбіт самых галоўных каштоўнасцей у жыцці кожнага чалавека.
Падчас конкурсу праверылі, як умеем вырашаць канфліктныя сітуацыі з педагогамі, бацькамі, дзецьмі. Як мы разам іх пераадольвалі, вучыліся процістаяць непаразуменням. Як дапамагае ў гэтым інтэрактыўны форум-тэатр (мы мадэліравалі сітуацыі і знаходзілі выйсце з кожнай), мы і прадэманстравалі гэта падчас абароны праекта. Дзейнічаюць акцыі – напрыклад, ужо добра вядомая акцыя дабра і міласэрнасці «Семь дорожек радуги», аздараўленчыя праграмы, у прыватнасці, загарадная змена ў лагеры «Зенітчык», культурна-забаўляльныя праекты, удзельнічаюць у якіх сем’ямі. Адзін з важных кірункаў – пашырэнне інфармацыйнага поля, мы супрацоўнічаем са сродкамі масавай інфармацыі, у ліку якіх – газета «Слуцкі край», радыёпраграма «Весткі Случчыны», тэлепраграма «Слуцк ТВ»: пашыраюцца веды грамадскасці, фарміруюцца талерантныя адносіны да асобых дзяцей, ствараюцца адпаведныя ўмовы, каб яны адчувалі любоў і клопат, мелі роўныя магчымасці з іншымі дзецьмі для самарэалізацыі, удзелу ў грамадскіх працэсах.
Вялікая ўдзячнасць усім, хто падтрымлівае цэнтр карэкцыйна-развіваючага навучання і рэабілітацыі, спрыяе развіццю дзейнасці: заўсёды з увагай да патрэб установы ставіцца кіраўніцтва Слуцкага райвыканкама, аддзела адукацыі, спорту і турызму райвыканкама, далучаюцца ўстановы адукацыі, медыцыны, прадпрыемствы і арганізацыі Случчыны. Шчыра дзякуем усім за адкрытасць, шчырасць і дабрыню, жадаем у новым годзе здароўя, дасягнення новых вышынь у дзейнасці, поспехаў і ўдачы.